ຕອນເຊົ້າຂອງວັນ​ທີ່ 20 ພະຈິກ 2017, ທີ່​ຫ້ອງ​ປະຊຸມ​ເຮືອນ​ພັກ​ແຄມງື່ມ ​ເມືອງ​ແກ້ວ​ອຸດົມ ​ແຂວງ​ວຽງ​ຈັນ ສູນພັດທະນາການສຶກສານອກໂຮງຮຽນໄດ້ຈັດກອງ​ປະຊຸມ ​ເຜີຍ​​ແຜ່​ບົດ​ວິ​ໄຈ​ການ​ສຶກສາ​ສະພາບ​ການ​ຈັດ​ຕັ້ງ​ປະຕິບັດ​ສູນ​ຮຽນ​ຮູ້​ຊຸ​ມຊົນ​ໃນ​ນະຄອນຫຼວງ​ວຽງ​ຈັນໄດ້ໄຂຂຶ້ນ ໂດຍ​ການ​ເປັນ​ປະທານຂອງ ທ່ານ ປອ ກ້າ ສະ​ເຫຼີມ​ສຸກ ຫົວໜ້າ​ກົມ​ການ​ສຶກສານ​ອກ​ໂຮງຮຽນ ​ແລະ ທ່ານ ສົມ​ສີ ​ສຸດທິວົງ ຜູ້ອຳນວຍການ​ສູນ​ພັດທະນາ​ການ​ສຶກສານ​ອກ​ໂຮງຮຽນ ຄະນະ​ອຳນວຍ​ການ ​ແລະ​ພະນັກງານ​ສູນ​ພັດ​ທະ​ນາ​ການ​ສຶກສານ​ອກ​ໂຮງຮຽນ,​ ກົມ​ຈັດ​ຕັ້ງ​ພະນັກງານ, ​ຫ້ອງການ​ກະຊວງ, ກົມ​ການ​ເງິ​ນກະຊວງ​ສຶກສາ​ທິການ ​ແລະ ​ກິລາ, ສະ​ຖາ​ບັນ​ພັດທະນາ​ອາ​ຊິ​ວະ​ສຶກສາ, ສະ​ຖາ​ບັນ​ພັດ​ທະ​ນາ​ການ​ບໍລິ​ຫານ​ການ​ສຶກສາ, ສູນ​ວິ​ໄຈ​ການ​ສຶກສາ​ທິການ ​ແລະ ​ກິລາ, ຫົວໜ້າ​ພະ​ແນ​ກກົມ​ການ​ສຶກສານ​ອກ​ໂຮງຮຽນ, ພະ​ແນ​ກສຶກສາ​ທິການ ​ແລະ​ ກິລາ​ນະຄອນຫຼວງ, ຂະ​ແໜງ​ ​ແລະ ສູນ​ການ​ສຶກສາ​ການ​ນອກ​ໂຮງຮຽນ​ນະຄອນຫຼວງ, ຄະນະ​ຫ້ອງການ​ສຶກສາ​ທິການ ​ແລະ ກິລາ ​ເມືອງ 4 ຕົວ​ເມືອງ ​ແລະ ຫົວໜ້າ​ສູນ​ການ​ຮຽນ​ຮູ້​ຊຸມ​ຊົນ 5 ສູນ​ໃນ​ນະຄອນຫຼວງ​ວຽງ​ຈັນ ​ລວມທັງ​ໝົດ 40 ທ່ານ ຍິງ 13 ທ່ານ.

ໃນ​ພິທີດັ່ງກ່າວ ທ່ານ ສົມ​ສີ​ ສຸດທິ​ວົງ ​ໄດ້​ກ່າວ​ຕ້ອນຮັບ​ຜູ້​ເຂົ້າ​ຮ່ວມ ​​ແລະ ຍັງ​ໄດ້​ຍົກ​ໃຫ້​ເຫັນ​​ເຖີງຄວາມສຳຄັນ ​ແລະ ຄວາມ​​ເປັນ​ມາ​ຂອງ​ບົດ​ວິ​ໄຈ​​ໃນ​ຄັ້ງ​ນີ້ວ່າ: ບົດ​ວິ​ໄຈ​ບົດ​ນີ້​ເປັນບົດ​ທຳ​ອິດ​ ເພື່ອເປັນການສຶກສາສະພາບກ່ຽວກັບສູນການຮຽນຮູ້ຊຸມຊົນ​ ​ດັ່ງ​ນັ້ນ, ສູນ​ພັດທະນາ​ການ​ສຶກສານ​ອກ​ໂຮງຮຽນຈິ່ງ​ໄດ້​​ເຮັດບົດວິ​ໄຈ​ກຽວ​ກັບການ​ດຳ​ເນິນ​ກິດຈະກຳ​ຂອງ ສູນ​ຮຽນ​ຮູ້​ຊຸມ​ຊົນ​ໃນ​ນະຄອນຫຼວງ​ວຽງ​ຈັນ ​​ເພືອຮັບຮູ້​​ສະພາບ​ຕົວ​ຈິງ​ຂອງ​ຊຸມ​ຊົນນັ້ນໆ​​ ​ເພາະ​ບົດ​ວິ​ໄຈ​ບົດ​ນີ້​ຈະ​ເປັນ​ຂໍ້​ມູນ​ທີ່​ດີໃຫ້​ແກ່​ຜູ້​ບໍລິຫານ​ທຸກ​ຂັ້ນ ​ແລະ ​ນັກວິ​ໄຈກ່ຽວກັບການສຶກສານອກ​ໂຮງຮຽນ​​ໃນ​ອະນາ​ຄົດ ​ເພື່ອ​ຈະ​ໄດ້​​​ເອົາ​ຂໍ້​ມູນ​ເລົ່າ​ນີ້​​​ໄປ​ເປັນ​ຕົວຢ່າງ​ໃນ​ການ​ເຮັດ​ບົດ​ວິ​ໄຈ​ຄັ້ງຕໍ່​ໄປ ​ເພາະ​ໃນ​ຕໍ່ໜ້າ​ຈະ​ຕ້ອງ​ໄດ້​ເຮັດ​ບົດ​ວິ​ໄຈ​ສູນ​ຮຽນ​ຮູ້​ຊຸນ​ຊົນ​ໃນ​ທົ່ວປະ​​ເທດ​​ ຂໍ໊ມູນ​ເລົ່າ​ນີ້ໄດ້​ມາສົມທຽບ​ວ່າ​ເປັນ​ຫຍັງ​ບາງ​ສູນຮຽນຮູ້​ຊຸມ​ຊົນ​ດຳ​ເນີນ​ກິດຈະກຳ​ໄດ້​ດີ​ ແຕ່​ບາງ​ສູນ​ບໍ່​ໄດ້ດຳ​ເນີນ​ກິດຈະກຳ​ ​ຂໍ້ມູນດັ່ງກ່າວທີ່ຈະເປັນຍ່ອນອີງໃນການແກ້​ໄຂ​ປັບປຸງ​ໃຫ້​ສອດຄ່ອງກັບ​ສະພາບ​ຕົວ​ຈິງ ​ແລະ ​ຄວາມ​ຕ້ອງການ​ຂອງ​ຊຸມ​ຊົນ​ໃຫ້​ກາຍ​ເປັນ​ສູນ​ການຮຽນ​ຮູ້​​​ແບບຍືນ​ຍົງ

ຫຼັງ​ຈາກ​ນັ້ນ, ທ່ານ ປອ ກ້າ ສະ​ເຫຼີ​ມສຸກ ຫົວໜ້າ​ກົມ​ການ​ສຶກສານ​ອກ​ໂຮງຮຽນ ຍັງ​ໄດ້​ຍົກ​ໃຫ້​ເຫັນ​ເຖິງຄວາມ​ສຳຄັນ​ຂອງ​ການຈັດ​ຕັ້ງ​ປະຕິບັດ​ຂອງ​ວຽກ​ງານ​ວິຊາ​ຊີບ​ຂັ້ນ​ພື້ນຖາ​ນຂອງ​ສູນ​ຮຽນ​ຮູ້​ຊຸມ​ຊົນ​​ເພາະ​ສູນ​ຮຽນ​ຮູ້​ຊຸມ​ຊົນ​ປຽບ​ເໝືອນ​ກັບ​ສະ​ຖາ​ບັນ​ການ​ສຶກສາ​ຜູ້​ໃຫຍ່​ຂອງທ່ອງ​ຖິ່ນນັ້ນໆ. ດັ່ງນັ້ນ, ​ເຮົາ​​ຄວນໄດ້​ເອົາ​ໃຈ​ໃສ່ ​​ເພາະ​ສູນ​​ຮຽນ​ຮູ້​ຊຸມ​ຊົນ​ເປັນ​​ສູນ​ແຫຼ່​ງຂໍ້​ມູນ​ຂ່າວ​ສານ, ​ເປັນບ່ອນ​ຝຶກ​ອົບຮົມ​ວິຊາ​ຊີບ, ​ເປັນ​ສູນ​ແຫຼ່ງການ​ຮຽນ​ຮູ້​ສຳລັບ​ຜູ້​ໃຫຍ່ ​ແລະ ​ເປັນ​ບ່ອນ​ປະຊາຊົນ​ປຶກສາ​ຫາລື​ວຽກບ້ານ​ການ​ເມືອງ ​ ​ປະ​ເທດ​ລາວ​ເຮົາ​ເປັນ​ປະ​ເທດ​ທີ່​ກຳລັງ​ພັດທະນາ ປະຊາຊົນ​ຍັງ​ບໍ່​ຮູ້​ໜັງ​ສືຫຼາຍ ຍິ່ງຄວນຈຳ​ເປັນ​ໃນ​ການຈັດ​ຕັ້ງ​ປະຕິບັດ​ສູນ​ຮຽນ​ຮູ້​ຊຸມ​ຊົນ ​​ເມື່ອ​ຕັ້ງ​ສູນຂຶ້ນ​ແລ້ວຈະ​ເຮັດ​​ແນວ​ໃດ​ໃຫ້​ສູນ​ເລົ່າ​ນັ້ນ​​ເປັນ​ສູນ​ຮຽນ​ຮູ້​ຕະຫຼອດ​ຊີວິດ ສະ​ນັ້ນ​ການ​ຂຽນ​ບົດ​ວິ​ໄຈ​ຈິ່ງ​ມີ​ຄວາມ​ຈຳ​ເປັນ​ທີ່​ສຸດ​ໃນ​ການ​ຈັ້ດຕັ້ງ​ສູນ​ຮຽນ​ຮູ້​ຊຸມ​ຊົນ ​ເພາະຂໍ້ມູນ​ເລົ່ານີ້ສາມາດ​ເຮັດ​ໃຫ້​ຜູ້​ບໍ​ລິ​ຫານ​ທຸກ​ຂັ້ນ​ໄດ້​ຮູ້​ຈຸດ​ອ່ອນ ​ແລະ ຈຸດ​ແຂງ​ນຳ​ເອົາ​ໄປ​ປັບປຸງ​ແກ້​ໄຂ​​ນະ​ໂຍບາຍ ​ແລະ ລະບຽບ​ການໃຫ້​ເໝາະ​ສົມ​ກັບ​ສະພາບ​ຂອງ​ສູນ​ຮຽນ​ຮູ້​ຊຸມ​ຊົນ​ໃຫ້​ແທດ​ເໝາະ​ຍິ່ງ​ຂຶ້ນ.

ກອງ​ປະຊຸມ​ດັ່ງກ່າວ​ຈະ​ໄດ້​ດຳ​ເນີນ​ລະຫວ່າງ​ວັນ​ທີ 20-22 ພະຈິກ 2017 ​ຈະ​ໄດ້​ແລກປ່ຽນ​ບົດຮຽນ​​ ​ແລະ ປະ​ກອບ​ຄໍາ​ຄິດ​ເຫັນ​​​ໃສ່​ບົດ ສຶກສາ​ສະພາບ​ການຈັດ​ຕັ້ງ​ປະຕິບັດ​ສູນ​ການ​ຮຽນ​ຮູ້​ຊຸມ​ຊົນ​ໃນ​ນະຄອນຫຼວງ​ວຽງ​ຈັນ ​ແລະ ສຶກສາ​ສະພາບ​ການຈັດ​ຕັ້ງ​ປະຕິບັດ​ສູນ​ການ​ຮຽນ​ຮູ້​ຊຸມ​ຊົນ​​ໃນ​ທົ່ວປະ​ເທດ ປະຈຳ​ປີ 2017 ກອງ​ປະຊຸມ​​ໄດ້ ​ແບ່ງກຸ່ມ​ປຶກສາ​ຫາລື​ໃນ​ຫົວ​ຂໍ້ຕ່າງໆ​ເຊັ່ນ:

  1. ແນວທາງ​ນະ​ໂຍບາຍ ​ແລະ​ ນິຕິ​ກຳ​ຕ່າງໆ​ກ່ຽວ​ກັບ​ສູນ​ຮຽນ​ຮູ້​ຊຸມ​ຊົນມີຄວາມສອດຄ່ອງພຽງໃດ ?
  2. ການ​ຄຸ້ມ​ຄອງ​ສູນ​ຮຽນ​ຮູ້​ຊຸມ​ຊົນ
  3. ການຈັດ​ຕັ້ງ​ກິດຈະກຳ​ຕ່່າງໃນແຕ່ລະສູນ
  4. ການ​ພົວພັນຮ່ວມ​ມື​ກັບ​ເຄືອ​ຄ່າ​ຍ​ ​ແລະ ຄູ່ຮ່ວມ​ງານ ​ແລະ ພາກສ່ວນ​ຕ່າງໆ.
  1. ໄດ້ຄົ້ນຄວ້າເຫັນບັນຫາ – ສາຍເຫດ ແລະ ຊອກຫາວິທີແກ້ໄຂໃນຕໍ່ໜ້າ
  2. ໄດ້ຕົກລົງເປັນເອກະພາບ ສະເໜີໃຫ້ກົມການສຶກສານອກໂຮງຮຽນ ຈັດເຝິກອົບຮົມການຄຸ້ມຄອງສູນໃຫ້ແກ່ຜູ່ບໍລິຫານຄືນໃໝ່
  3. ຄວນໄດ້ເພີ່ມງົບມະມານໃຫ້ແຕ່ລະສູນຕືມອີກເພື່ອດຳເນີນກິດຈະກຳໄດ້ປົກກະຕິ ແລະ ຕໍ່ເນື່ອງ

ກອງປະຊຸມໃນເທື່ອນິີ້ ເຖີງແມ່ນວ່າໄດ້ດຳເນີນໄປດ້ວຍເວລາອັນສັ້ນໆ ແຕ່ກໍ່ໄດ້ຮັບຜົນປະໂຫຍດສູງໃນການເພີມເຕີມເນື້ອໃນໃສ່ບົດວິໄຈໄດ້ສົມບູນທັງໄດ້ຖອດຖອນບົດຮຽນແລກປຽ່ນປະສົບການຕົວຈິງຈາກບັນດາພະແນກສຶກສາທິການ ແລະ ກິລານະຄອນຫຼວງ ແລະຈາກຫ້ອງການສຶກສາທິການ ແລະ ກິລາເມືອງໃນ 4 ຕົວເມືອງຕື່ມນຳອີກ ເພື່ອຈະນຳໄປປັບປຸງແກ້ໄຂເຮັດໃຫ້ສູນຮຽນຮູ້ຊຸມຊົນມີການພັດທະນາດີຂຶ້ນ ເພື່ອໃຫ້ມີຄວາມຍືນຍົງຕະຫຼອດໄປ.

ໂດຍ: ວັນຄຳ ນວນພານິດ

LEAVE A REPLY

Please enter your comment!
Please enter your name here