ວັນຄູແຫ່ງຊາດແມ່ນວັນໜຶ່ງທີີ່ມີຄວາມໝາຍ, ຄວາມສຳຄັນທາງດ້ານການສຶກສາແຫ່ງຊາດ ເພາະວ່າຄູແມ່ນນັກວິສະວະກອນແຫ່ງດວງວິນຍານ, ຄູຄືແມ່ພິມຂອງຊາດ, ຄູບໍ່ວ່າຢູ່ໃນຍຸກສະໄໝໃດກໍ່ເປັນຜູ້ປັ້ນຫຼໍ່ກໍ່ຮາກ ໃຫ້ຄົນເຮົາພົ້ນອອກຄວາມໂງ່ຈ້າຫຼ້າຫຼັງໄປເທື່ອລະກ້າວ.

ໃນວັນທີ 5 ຕຸລາ 2018  ທີ່ຜ່ານມາ ທີ່ສູນພັດທະນາການສຶກສານອກໂຮງຮຽນ (ສພນ ຫຼັກ 8), ກົມການສຶກສານອກໂຮງຮຽນ (ກສນ), ກະຊວງສຶກສາທິການ ແລະ ກິລາ (ສສກ) ໄດ້ຈັດພິທີສະເຫຼີມສະຫຼອງ ວັນຄູແຫ່ງຊາດ ວັນທີ 07 ຕຸລາ ຄົບຮອບ 24 ປີ ໂດຍໃຫ້ກຽດເປັນປະທານຂອງ ທ່ານ ສົມສີ ສຸດທິວົງ ຜູ້ອຳນວຍການສູນພັດທະນາການສຶກສານອກໂຮງຮຽນ, ພ້ອມນັ້ນຍັງມີ ອະດີດພະນັກງານ ແລະ ພະນັກງານພາຍໃນ ສູນພັດທະນາການສຶກສານອກໂຮງຮຽນລວມ 45 ຄົນ, ຍິງ 24 ຄົນ.

ໂອກາດດັ່ງກ່າວ, ອະດີດພະນັກງານບຳນານ ແລະ ຜູ້ອຳນວຍການສູນພັດທະນາການສຶກສານອກໂຮງຮຽນ ຍັງໄດ້ກ່າວ ໃຫ້ທິດໃນການຈັດຕັ້ງປະຕິບັດໜ້າທີ່ຂອງພະນັກງານ ແລະ ພ້ອມທັງຮັກສາມູນເຊື້ອຮັກແພງສາມັກຄີເຊິ່ງກັນ ແລະ ກັນ.

ໃນພິທີໄດ້ມີກິດຈະກຳ: ເຜີຍແຜ່ວີດີໂອວັນລົບລ້າງຊັ້ນປະຖົມສຶກສາບຳລຸງທົ່ວປະເທດຄັ້ງວັນທີ 28 ສິງຫາ 2015 ແລະ ການໃຫ້ພະນັກງານທຸກຄົນຂຶ້ນຈົກສະຫຼາກຄຳຖາມເພື່ອເວົ້າກ່ຽວກັບບົດບາດ, ໜ້າທີ່ ແລະ ທັດສະນະຄະຕິ ກ່ຽວກັບຄວາມເປັນຄູຂອງພະນັກງານທຸກໆຄົນ, ແລະ ຮ່ວມກັນຟ້ອນລຳວົງສາມັກຄີ.

ໂດຍ: ກ. ສຸດທີ່ຮັກ

LEAVE A REPLY

Please enter your comment!
Please enter your name here