ວັນທີ 8 ກັນຍາ 1967 ເປັນວັນທີ່ຖືກປະກາດໃຫ້ເປັນວັນສາກົນແຫ່ງການລົບລ້າງຄວາມບໍ່ຮູ້ໜັງສືຢູ່ໃນກອງປະຊຸມໃຫຍ່ ຂອງອົງການອຸຍແນດສະໂກຄັ້ງທີ 14. ນັບແຕ່ນັ້ນມາ, ທົ່ວໂລກກໍ່ໄດ້ຈັດຕັ້ງການສະເຫຼີມສະຫຼອງວັນດັ່ງກ່າວແຕ່ລະປີເປັນປະຈໍາ ທັງນີ້ກໍ່ເພື່ອເປັນການເຕືອນສະຕິ ແລະ ປູກຈິດສໍານຶກຂອງສັງຄົມ ໃຫ້ເຫັນຄວາມສໍາຄັນຂອງການຮູ້ໜັງສື ໃນຖານະທີ່ຖືບັນຫາດັ່ງກ່າວນີ້ເປັນເລື່ອງຂອງກຽດສັກສີຂອງຄວາມເປັນມະນຸດ ແລະ ສິດທິຂອງມະນຸດ, ແລະ ເພື່ອຍົກລະດັບຄວາມສໍາຄັນຂອງງານດັ່ງກ່າວນີ້ເປັນພື້ນຖານໃຫ້ແກ່ການກ້າວເຂົ້າສູ່ການສ້າງສັງຄົມແຫ່ງການຮູ້ໜັງສື ແລະ ຍືນຍົງ.

ໃນວັນທີ 7 ກັນຍາ 2018  ທີ່ຜ່ານມາ ທີ່ສູນພັດທະນາການສຶກສານອກໂຮງຮຽນ (ສພນ ຫຼັກ 8) ຮ່ວມກັບ ກົມການສຶກສານອກໂຮງຮຽນ (ກສນ), ກະຊວງສຶກສາທິການ ແລະ ກິລາ (ສສກ) ໄດ້ຈັດພິທີສະເຫຼີມສະຫຼອງວັນສາກົນແຫ່ງການລົບລ້າງຄວາມບໍ່ຮູ້ໜັງສື (8 ກັນຍາ 1965 – 8 ກັນຍາ 2018) ຄົບຮອບ 53 ປີ ໂດຍໃຫ້ກຽດເຂົ້າຮ່ວມ ແລະ ເປັນປະທານຂອງ ທ່ານ ນາງ ຂັນທະລີ ສີຣິພົງພັນ, ຄະນະປະຈໍາພັກກະຊວງ, ຫົວໜ້າຫ້ອງການ ກະຊວງສຶກສາ ທິການ ແລະ ກິລາ, ພ້ອມນັ້ນຍັງມີ ຫົວໜ້າ-ຮອງ ກົມການສຶກສານອກໂຮງຮຽນ, ບັນດາຫົວໜ້າພະແນກ-ຮອງພະແນກພ້ອມດ້ວຍພະນັກງານວິຊາການຈາກກົມ, ສູນ, ແຂກທັງພາຍໃນ  ແລະ ຕ່າງປະເທດ ລວມ 70 ກວ່າຄົນ.

ໃນພິທີ, ທ່ານ ນາງ ພິລານີ ພິດສະໄໝ ຮອງຫົວຫນ້າກົມການສຶກສານອກໂຮງຮຽນ, ໄດ້ຜ່ານບົດຖະແຫຼງການຂອງທ່ານເລຂາທິການໃຫຍ່ອົງການອຸຍແນດສະໂກ, ກ່ຽວກັບວັນສາກົນແຫ່ງລົບລ້າງຄວາມບໍ່ຮູ້ໜັງສື (8 ກັນຍາ) ໄດ້ລະບຸວ່າ:ຖ້າເຮົາໄດ້ຮຽນອ່ານຫນັງສືເຮົາສາມາດມີຄວາມເປັນອິດສະຫຼະຕະຫຼອດໄປ ນີ້ແມ່ນຄໍາເວົ້າຂອງທ່ານ ເຟເດຣິກ ດູກາດ, ເຊິ່ງໄດ້ຂຽນໄວ້ໃນສັດຕະວັດທີ 19.

ຫຼັງຈາກນັ້ນ, ທ່ານ ປອ ກ້າ ສະເຫຼີມສຸກ ຫົວໜ້າກົມການສຶກສານອກໂຮງຮຽນ ຍັງໄດ້ໂອ້ລົມແລກປ່ຽນກັບບັນດາຜູ້ເຂົ້າຮ່ວມກ່ຽວກັບວັນສາກົນແຫ່ງການລົບລ້າງຄວາມບໍ່ຮູ້ໜັງສື ກ່ຽວກັບຫົວຂໍ້ສໍາລັບການສະເຫຼີມສະຫຼອງ ວັນສາກົນແຫ່ງການລົບລ້າງຄວາມບໍ່ຮູ້ໜັງສື ປີ 2018””” ການຮູ້ໜັງສື ແລະ ການພັດທະນາທັກສະດ້ານຕ່າງໆ’ ເຊິ່ງເປັນການຍົກສູງຄວາມສໍາຄັນຂອງການພັດທະນາຊາວຫນຸ່ມ ແລະ ຜູ້ໃຫຍ່ພາຍໃຕ້ຂອບການພັດທະນາການຮຽນຮູ້ຕະຫຼອດຊີວິດ, ການເຊື່ອມໂຍງທີ່ມີປະສິດທິຜົນລະຫວ່າງການຮູ້ຫນັງສື ແລະ ທັກສະດ້ານຕ່າງໆ. ໃນນີ້, ຄໍາວ່າ “ທັກສະດ້ານຕ່າງໆ” ແມ່ນໝາຍເຖິງ ຄວາມຮູ້, ທັກສະ ແລະ ຄວາມສາມາດທີ່ຕ້ອງການສໍາລັບການສະໝັກງານໃນຕະຫຼາດແຮງງານ, ການປະກອບອາຊີບ, ແລະ ການດໍາລົງຊີວິດປະຈໍາວັນ ໂດຍສະເພາະແມ່ນທັກສະທາງດ້ານເຕັກນິກ ແລະ ວິຊາຊີບດ້ານຕ່າງໆ ຕະຫຼອດຮອດທັກສະການປັບຕົນເຂົ້າກັບການປ່ຽນແປງໃຫມ່ຂອງສັງຄົມ ແລະ ຍຸກສະໄຫມຄວາມກ້າວໜ້າຂອງເຕັກໂນໂລຊີດິຈິຕອນ.

ນອກນັ້ນໃນພິທີ, ຍັງໄດ້ຈັດກິດຈະກຳສະເຫຼີມສະຫຼອງວັນສາກົນແຫ່ງການລົບລ້າງຄວາມບໍ່ໜັງສື ເປັນຕົ້ນ ປ່ອຍປຸມເປົ້າ, ຍ່າງເພື່ອສຸຂະພາບ, ຊົມການວາງສະແດງສື່ການຮຽນ-ການສອນ, ຜະລິດຕະພັນ, ຫຼິ້ນກິລາກັບບັນດາແຂກທີ່ຖືກເຊີນ, ພະນັກງານຈາກກົມ ແລະ ສູນ ດ້ວຍບັນຍາກາດທີ່ມີຄວາມໝາຍ ແລະ ເຕັມໄປດ້ວຍຄວາມເບີກບານມ່ວນຊື່ນ.

ໂດຍ: ກ. ສຸດທີ່ຮັກ

LEAVE A REPLY

Please enter your comment!
Please enter your name here