ການປັບປຸງຫຼັກ​ສູດການສຶກສານອກໂຮງຮຽນຕາມ​ແຜນ​ພັດທະນາ​ 5 ປີ ການ​ສຶກສາ​ຄັ້ງ​ທີ VIII ​ແມ່ນ​ຄວາມ​ຈຳ​ເປັນ​ພາ​ວະ​ວິ​ໄສ. ເຖິງວ່າ ສປປລາວ ໄດ້ປະກາດຈົບຊັ້ນປະຖົມບຳລຸງທົ່ວປະເທດ ​ໃນ​ປີ 2015 ແລ້ວກໍ່​ຕາມ, ​ແຕ່​ເຫັນ​ວ່າ ປະ​ຊາ​ຊົນ​ຈຳ​ນວນ​ໜຶ່ງ​ຍັງ​ພາດ​ໂອ​ກາດ ແລະ ບໍ່​ໄດ້​ເຂົ້າ​ເຖິງ​ການ​ສຶກ​ສາ​ໃນ​ຮູບ​ແບບ​ຕ່າງໆໂດຍ​ສະ​ເພາະແມ່ນ​ຢູ່​ເຂດ​ຮ່າງ​ໄກ​ສອກຫຼີກ, ຈຳນວນ​ຜູ້​ຮຽນບໍ່ຈົບ ​ແລະ ປະລະ​ຈາກການ​ສຶກ​ສາ​ສາຍ​ສາ​ມັນ​​ກໍ​ຍັງມີ​ທ່ວງທ່າ​ທີ່​ສູງ, ​ການ​ປະ​ລະການຮຽນ ແລະ ການຕົກຫຼົ່ນການຮຽນຂອງກຸ່ມ​ເປົ້າໝາຍ​ການ​ສຶກສານ​ອກ​ໂຮງຮຽນ ​ແລະ ຈຳນວນທີ່​ກັບ​ມາ​ກືກ​ຄືນກໍ່​ຍັງ​ເປັນ​ສິ່ງ​ທີ່​ທ້າ​ທາຍ.  ສະ​ນັ້ນ, ຈຶ່ງ​ເຫັນ​ໄດ້​ວ່າ​ການ​ພັດ​ທະ​ນາຫຼັກ​ສູດບຳ​ລຸງ​​ຊັ້ນ​ປະ​ຖົມ​ການ​ສຶກ​ສາ​ນອກ​ໂຮງ​ຮຽນຄືນ ໂດຍ​ສະ​ເພາະ​ແມ່ນປຶ້ມ​​ຄູ່ມືຄູ ແລະ ແບບ​ຮຽນ ແມ່ນ​ມີ​ຄວາມ​ສຳຄັນຢ່າງຍິ່ງໃຫ້ສາມາດ​ຮັບປະກັນຄວາມ​ສອດຄ່ອງ​ກັບ​ຜູ້​ສອນ ​ແລະ ຜູ້​ຮຽນ​ໃນ​ສະພາບ​ປັດຈຸບັນ ຮັບປະກັນ​ໄດ້​ທາງ​ດ້ານ​ຄຸນ​ນະພາ​ບ ​ແລະ ສາມາດ​ທຽບ​ເທົ່າກັບ​ການ​ສຶກສາ​ໃນ​ໂຮງຮຽນ.

ໃນວັນທີ 27 ພະຈິກ 2017 ສູນ ພັດທະນາການສຶກສານອກໂຮງຮຽນ ກົມ ການສຶກສານອກໂຮງຮຽນ ກະຊວງສຶກ ສາທິການ ແລະ ກິລາ ໄດ້ເປີດກອງ ປະຊຸມແນະນຳການຂຽນປື້ມແບບຮຽນ, ຄູ່ມືຄູ ຫຼັກສູດຊັ້ນປະຖົມສຶກສານອກ ໂຮງຮຽນ ທີ່ຫ້ອງປະຊຸມບ້ານພັກແຄມງື່ມ ເມືອງແກ້ວອຸດົມ ແຂວງວຽງຈັນ ພາຍ​ໃຕ້ການເປັນປະທານຂອງ ທ່ານ ປ.ອ ກ້າ ສະເຫຼີມສຸກ ຫົວໜ້າກົມການ ສຶກສານອກໂຮງຮຽນ ກະຊວງສຶກສາທິການ ແລະ ກິລາ, ມີຄະນະ​ອຳນວຍການສູນພັດທະນາການສຶກສານອກໂຮງຮຽນ ແລະ ຜູ້ເຂົ້່າຮ່ວມຈາກຄະນະພະແນກລົບລ້າງຄວາມບໍ່ຮູ້ໜັງສື ກົມການສຶກສານອກໂຮງຮຽນ, ສະຖານບັນຄົ້ນຄ້ວາວິທະຍາສາດການສຶກສາ, ວິຊາການສູນພັດທະນາການສຶກສານອກໂຮງຮຽນ, ຂະແໜງການສຶກສານອກໂຮງຮຽນ ພະແນກສຶກສາທິການ ແລະ ກິລາ ແຂວງບໍລິຄຳໄຊ ແລະ ພະນັກງານອາວຸໂສບຳນານຈຳນວນໜຶ່ງທັງໝົດ 23 ທ່ານ, ຍິງ 8 ທ່ານ​ໄດ້​ເຂົ້າ​ຮ່ວມ.

ກອງປະຊຸມຄັ້ງນີ້ຈະໄດ້ດຳເນີນເປັນເວລາ 3 ວັນ ນັບແຕ່ວັນທີ 27-29 ພະຈິກ 2017 ຈຶ່ງຈະສຳເລັດ ຊຶ່ງຄະນະຮັບຜິດຊອບໄດ້ນຳສະເໜີ​ຂະ​ບວນການ​ພັດທະນາຫຼັກສູດ​​ໃນ​ແຕ່ລະ​ໄລຍະ ​ໂດຍ​ອີງ​ໃສ່​ຄວາມ​ສອດຄ່ອງ​ກັບ​ແນວທາງ​ການ​ປ່ຽນ​ແປງ​​ໃໝ່​ຂອງ​ພັກ​ແຕ່ລະ​ໄລຍະ, ການ​ປ່ຽນ​ແປງ​ທາງ​ເສດຖະກິດ-​ສັງຄົມ ​ແລະ ສິ່ງ​ແວດ​ລ້ອມປັດຈຸບັນ ທັງ​ເປັນ​ການ​ຮັບປະກັນ​ໃຫ້​ປະຊາຊົນ​​ໃນ​ກຸ່ມ​ເປົ້າ​ໝາຍ​ການ​ສຶກສານ​ອກ​ໂຮງຮຽນໄດ້​ຮັບ​ການ​ສຶກສາຢ່າງ​ທົ່ວ​ເຖິງ ​ແລະ ມີ​ຄຸນ​ນະພາ​ບ. ການ​ປັບປຸງ​ບາງ​ເນື້ອ​​, ຮູບ​ແບບ ​ແລະ ວິທີ​ການ​ສອນ ຂອງ​ປຶ້ມ​ແບບຮຽນ ​ແລະ ຄູ່​ມື​ຄູ ​​ແມ່ນ​ມີ​ຄວາມ​ຈຳ​ເປັນ.

ກອງປະຊຸມແນະນຳການຂຽນປື້ມແບບຮຽນ ແລະ ຄູ່ມືຄູ ຫຼັກສູດ​ການ​ສຶກສາຊັ້ນ​ປະຖົມນ​ອກ​ໂຮງຮຽນ ​ແມ່ນ​ເພື່ອ​ເປັນ​ການ​ຮັບປະກັນ​ວ່າ​ຜູ້​ທີ່​ຈະ​ຂຽນ​ເນື້ອ​ໃນ​ດັ່ງ ກ່າວ​ມີ​ຄວາມ​ເຂົ້າ​ໃຈ​ເປັນ​ເອກະ​ພາບ​ທາງ​ດ້ານ​ຫຼັກການ ຈຸດ ປະສົງ​ລະດັບ​ຄາດໝາຍ ​ແລະ ກຸ່ມ​ເປົ້າ​ໝາຍ​ທີ່​ຈະ​ນຳ​ໃຊ້​ຫຼັກສູດ​ນີ້ໃນ​ຕໍ່ໜ້າ​.  ຜູ້​ເຂົ້າ​ຮ່ວມ​ຈະ​ໄດ້​ພ້ອມ​ກັນ​ຄົ້ນຄວ້າ​ເຖິງ​ອົງ​ປະກອບ​ຂອງ​ແຕ່​ລ​ະບົດ, ການຈັດ​ລຳດັບ​ຄວາມ​ສຳຄັນ​​ໃນການ​ຮຽນ​ພາສາ​ລາວ, ຄະນິດສາດ ​ແລະ ​ເອກະ​ພາບ​ທາງ​ດ້ານ​ໂຄງ​ສ້າງ-​ໂຄງ​ຮ່າງ​ຂອງ​ແຕ່​ລະ​ບົດ. ​ໃນ​ຕອນ​ທ້າຍ​ແຕ່​ລະ​ກຸ່ມ​ກໍ​ໄດ້​ນຳ​ສະ​ເໜີ​ແບບ​ແຜນ​ວິທີ​ເຮັດ​ວຽກ​ຂອງ​ແຕ່​ລະ​ກຸ່ມ​ເພື່ອ​ຮັບປະກັນ​ໄດ້​ທາງ​ດ້ານ​ເນື້ອ​ໃນ ​ແລະ ຄຸນ​ນະພາ​ບຂອງ​ປຶ້ມ​ແບບຮຽນ ​ແລະ ຄູ​ມື​ຄູ ຊຶ່ງ​ຄາດ​ວ່າ​ທ້າຍ​ປີ 2018 ຈະ​ສາມາດ​ສຳ​ເລັດ​ເປັນ​ຕົ້ນ​ສະບັບ, ​ເຂົ້າ​ຈັດ​ພິມ ແລະ ນຳໃຊ້​ໃນ​ຕົ້ນ​ປີ 2019.

ໂດຍ: ຢ ເຈີຕົງວ່າງ

LEAVE A REPLY

Please enter your comment!
Please enter your name here